Aneddoti vari

Nu signoru svizzeru capitavu ind'a nu barru a Nuscu e addummannavu nu café. La patrona preparavu lu piattinu, lu cucchiarinu, muttivu la tazza sotta la machina, feci scorru ru café, pó prima ri lu servu, pigliavu dui belli cucchiari ri zuccaru e ngi ru muttivu indu.

-Mi scusi signora ma io non prendo caffè con zucchero-

-Siendi nui accussì ru facimu, si ru buoi ri nata manera, va ti ru piglia a nata partu-

******

Lu patru ri Nduniucciu era partutu pu Svizzera a circà furtuna.

Lu guagliungiellu guardava tutti li juorni la fotografia ca lu patru, vustutu ra militaru, s'era fattu sotta le armi.

La viernurì sandu, pu ru manovru, arruvavu a Nuscu n'eserciutu ri surdati chi attiravanu la curiosità e l'ammirazionu ri lu criaturu. Quistu angora nnucendu, currivu a la casa, angappavu la pizza chiena ca la mamma aveva fattu pu Pasqua e la rivu a lu primu surdatu chi scundavu. Tuttu cundendu scappavu a l'uortu alluccannu:

Mà, oj mà, è turnatu papà e i' l'aggi ratu la pizza chiena!

******

Matucciellu tuneva quatt'anni, era stutu, ndiliggendu e parlava comu a unu gruossu. Quannu vunivunu li cumbari ra la Svizzera, quisti avandavanu lu criaturu:

-Ma quandu s'è fattu bellu, com'è stutu stu cumbariellu, sai rici comu ti chiami? quand'anni tieni?-

Niendi ra fà, lu guagliungiellu girava la capu e nun duceva na parola. Li cumbari, cu na cioccolata nmanu nzustevanu, ma Matucciellu chiù ngrugnava e nun apreva vocca.

-Ah! quissu si mettu scuornu quannu nun canosci la gendu- rissu la cummara -Matuccì fa sendu comu parli, rilli ciucciu a lu cumbaru-

Lu criaturu nun ngi punzavu roi votu:

-Ciucciu cumbaru, ciucciu cumbaru!-

******

Stella, ri mamma svizzera, era vunuta quir'annu pu canosci Nuscu, lu paesu ri lu patru. Cu li fraticucini ieva zumbannu ra Ngoppacastiellu a Sandurunatu, ra via Fundana a Portamulinu e sfuriava lundana ra la città.

Nu juornu trasivu andó la fruttivendola:

-Signora vorrei una fetta d'anguria-

-Ri che?- ruspunnivu Ndunetta.

-D'anguria signora- La cristiana si guardavu attuornu e circava, pó pu nun passà pu fessa:

-L'ammu finita a zia, nun ni tunimu chiù-

-Ma come signora e questa cos'è?- nzingannu ngoppa na buffetta.

-Ah!? Ma quistu si chiama mulonu! Puozzi cambà ciend'anni.-

******

Ndunetta Bianganiellu era na femmuna fina e gindila, si vusteva cu eleganza e circava sembu ri fà bella figura quannu parlava cu la gendu. La cristiana però aveva fattu poca scola e si vureva quannu aveva leggi o ri scrivi.

Nu juornu, pu rinnuvà lu passapuortu, ivu a lu conzolatu a Losanna e aveva enghj nu fogliu cu nomu, cugnomu, data ri nascita e atu cosu. Si muttivu pu la sanda pacienzia e doppu nu quartu r'ora cunsignavu la carta a lu mbiegatu. Quistu roppu picca si vutavu nfacci a Ndunetta:

-Ma lei si chiama Biancanello o Biancaniello? A noi ci risulta Biancaniello!-

-Nun ngi fà casu signoru Conzulu, quissi songu li paisani chi mi chiamanu Ndunetta Bianganiellu, ma in italianu i' mi chiamu Antonietta Biancanello!

******

Quiru 29 ri lugliu attuornu a la villa era chjnu ri bangarellu e li patruni, cu la voci abbrucata, la pezza ngimma lu microfanu, avandavanu panni e prezzi. La gendu ieva annanzi e arretu strufinannusi unu cu l'atu. A gruppi sani si fermavanu, si salutavanu e bloccavanu lu passaggiu. Ng'eranu facci abbruciatu ra lu solu, ngipriatu, cu l'accendu ofandanu, stranisu.

Carmela, chi steva a la Svizzera, avev'accattà quacche maglia, na cannottiera, roi tre tuvagliu e nu musalu.

Roppu fattu lu giru tre botu pu scanaglià li prezzi, si fermavu andó nu napulitanu, mai vistu prima, sciuglivu la robba, pó:

-Cumbà, fatti la croci, i' só clienda fissa e ogni annu vengu andó a tè direttamendu senza passà andó l'ati, mi canusci? T'arricuordi ri me? L'annu scorsu spunnietti chiù di ciendi mila liru!

-Signó nu r'avita mangu addummannà, v'aggi canusciutu ra lundanu, vui siti na clienda affezionata e vi fazzu nu prezzu prilibbatu

.

******

Ndoniu era arruvatu a Nuscu ra la Svizzera. Ndunetta, la miglieru nun era pututa vunì. Quannu ivu foru pu salutà Grazia e Michelu, truvavu la cummara sola.

Questa lu feci assittà, li pigliavu lu vinu frishcu e nziemi si feciunu nu pari ri bicchieri. A stu pundu Ndoniu l'affurravu e la vuleva vasà:

-Comba Ndó, qua nun è cosa, si si trova a bunì Michelu ngi' acciri a tutti e dui, vieni cu me, jamu a lu pagliaru, però, m'hè a prumettu ri chiuri l'uocchj e di punzà a comma Ndunetta chi è tandu na bona cristiana e chi, songu sicura, quannu venu si leva l'óbblicu cu Michelu miu!-

                                                                          Pietro Russo