Ogni annu quattu o cingu guagliuni furtunati partevanu ra Nuscu e ghievanu a la culonia marina. Quir'annu capitavu puru a me e che priezza, pu la prima vota puteva vurè lu maru.
Prima ri parti mamma mi priparavu lu curredu obblicatorio: scarpu, sandali, asciucamanu, saponu, spazzulinu e dendifriciu. Muttivu tutta sta robba ind'a nu saccutiellu ri pezza ca feci essa stessu e pó ngi scruvivu lu nomu miu cu lu labbusu copiativu. Ogni tandu i' mi lu guardava quiru nomu bellu gruossu e mi sundeva mburtandu assai.
Partiemmi ra Nuscu na matina priestu cu Cilardu, Vicienzu, Ndoniu e Vitucciu nu guagliungiellu ca nun aveva mai vistu prima pucchè abbitava foru, arruvammi a Mercatello vicinu Saliernu - avessa rici roppu mangiatu - ma siccomu ca la panza era vacanda, rucimu a lu pomeriggiu. Ru monacu si ni pozzanu accorgi puché, la virità, ngi'avevanu priparatu certi piatti ri pasta brurosa e bella cotta e pó panu e formagginu giallu e ngi faciemmi tunni tunni.
Ngi rivunu certi grembiali celestini e "In fila per due" ngi purtavunu a fa na bella passiata cu nmiezz'a lu paesu snza vuré lu maru peró. Quannu ngi'arritirammi ngi purtavunu ind'a ru cameratu, li chiù picciuli ra na partu, nu lunzulu appisu pó li chiù gruossi a l'ata partu.
E che bu rormu, faceva nu càvuru e pó tutti zumbavanu pu cimma li lietti affì chi la signurina chi ngi guardava ind'a nu bardacchinu ri frondu ngrifavu fortu e divu n'alluccu:
- Domani sarete tutti puniti e non vedrete il mare! -
Nu l'avessu mai munduatu lu maru. E che simu vunuti a fà si no? Tutti ciuttiemmi e ngi'addurmiemmi.
La matina priestu cu l'asciucamanu nguollu, ru saponu, lu spazzolinu e lu dentifriciu, in fila per due, iemmi a lu cortilu chjnu ri fundanellu.
- Ragazzi - rissu la signurina - lavatevi bene le orecchie, il collo e poi i denti col dentifricio -
Tutti nzapunavami e sciacquavami, pò ngi lavavami li riendi meno Vitucciu chi s'aveva futtutu miezzu tubbettu ri dentifriciu e tuttu cundendu alluccava: - E' buonu lu rettifriciu! E' buonu lu rettifriciu! -
Al canto di "Fratelli d'Italia" partiemmi a la conquista ri lu maru .... e che maru! nu metru ri larghezza e dui ri lunghezza. Na funa tuornu tuornu limitava lu spaziu, parevami tanda sardinu una a fiangu a l'ata peggiu ri li valluni a Nuscu, ne ti putivi tuffà pucchè l'acqua ngi'arruvava a ru dunocchia, Sulu Vitucciu era cundendu e alluccava:
-Lu maru è saritu, è saritu!-
Pietro Russo
_______________________________________________________________________________________________
Colonia marina: Venivano offerte ai bambini disagiati, creando ai loro genitori altri disagi come l'aquisto del corredo (asciugamani,scarpe,spazzolino e dentifricio)
Labbusu copiativu: matita copiativa, indelebile.
Formaggio giallo: Era un formaggio di colore giallo e dal sapore strano, per noi affamati era delizioso. Sugli imballaggi c'era la scritta "Dono del popolo americano"
Dentifricio: In quel tempo poca gente lo utilizzava. Noi che abitavamo in paese sapevamo che serviva per lavarsi i denti. Vito era un ragazzino di campagna e purtroppo non lo aveva mai visto. Guardando i compagni metterselo in bocca, pensò fosse roba da mangiare.
saritu: salato
